Pripreme za dan vjenčanja traju dugo. Uglavnom se bira duga bijela vjenčanica, muško odijelo, cipele, šminka. Takođe, bira se muzika, a često se ide i na časove plesa kako bi sve prošlo onako kako treba

Međutim, to nije bio slučaj kod Bjelopoljca Milenka i Mojkovčanke Milice Vlahović koji su se prije nekoliko dana vjenčali i to baš u crnogorskoj narodnoj nošnji i odigrali prvi ples koji je oduševio sve prisutne.

„Moja želja je uvijek bila to i podijelila sam je sa suprugom. Kako je vrijeme odmicalo, tako se i naš odnos prema nošnji mijenjao u smislu sve veće ljubavi i poštovanja prema istoj. Shvatili smo da ništa ne može biti ljepše i efektnije. To je nešto što se pamti“, kaže Milica za FOS.

Svojim izgledom su oduševili sve prisutne, a taj osjećaj je kaže, tešo opisati riječima.

„Svaba je u jesenje vrijeme pa je malo hladnije, a muška nošnja je mnogo zahtjevna“, kaže Milica i dodaje:

„Neponovljiv su osjećaj lica ljudi kada smo ih na ulazu dočekali u nošnji. I taman kad smo mislili da ne može više od toga, nastupile su ovacije kada smo počeli da igramo. Aplauz svih prisutnih je nešto što se ne može opisati riječima. Skoro svi su ples objavili na društvenim mrežama i komentari su bili predivni.“

Igrali su uz pjesmu „Iz mora korali“ koju u originalu izvode Zoran Kalezić i Lepa Lukić.

Izvor:Kolektiv.me