O ponedjeljku i početku radne nedelje mnogi počnu da brinu već u nedjelju popodne ili nedjelju uveče. Ponedjeljak mnogo teže pada svima tokom ljeta, kada se mnogi vraćaju sa odmora.
Ljudi se žale čak 30 minuta svakog ponedjeljka, pogotovo ujutru, a počinju da brinu već noć prije ili u nedjelju popodne, pokazuju istraživanja.
Kako biste izbjegli tjeskoban početak jutra, i cijele radne nedelje uostalom, uvedite male promjene koje će vam pomoći da ga lakše "preživite". Imajte na umu da će ponekad neki ponedjeljci i dalje biti haotični, ali pomaganjem samima sebi možemo to da promijenimo.
Možete izabrati jedan od ovih predloga, više njih ili sve, kako vama odgovara.
- Produžite vikend tako što ćete ustati ranije u ponedjeljak
Možda vam zvuči čudno, ali nema gore stvari nego ustati u ponedjeljak ujutru u posljednjem trenutku i "jurnuti" na posao. To samo pojačava stres oko početka radne nedelje i kraja priajtnog vikenda u kojem ste radili šta ste željeli. Produžite vikend sami sebi tako što ćete u ponedjeljak ustati ranije, na miru popiti kafu, spremiti stvari, razmišljati o svemu što vas čeka ili lijepom vikendu koji ste imali.
- Sjetite se na čemu ste zahvalni i šta je dobro u tom danu
Naš mozak prirodno gleda na stvari negativno pa moramo tjerati sami sebe da tako ne razmišljamo i da pokušavamo da se usmjerimo prema pozitivnom.
Zapišite ili mislite na tri stvari na kojima ste zahvalni. Male ili velike, potpuno je nebitno. Možete ih zapisati i u mobilni, ako vam tako odgovara.
Možda je ipak dobro što imate posao na koji morate da idete? Možda na poslu imate drage kolege koje volite da vidite? Možda je dobro što ćete prošetati, uposliti mozak, uraditi nešto korisno?
- Namjestite krevet, sklonite šoljice
Kod mnogih ljudi nered u stanu znači i haos u glavi pa se puno bolje osjećaju kada su stvari složene i uredne. Ako i vi tako funkcionišete, namjestite krevet ponedjeljkom prije nego što krenete na posao. To će vam dati osjećaj zadovoljstva, ponosa i podstaći vas na sljedeći zadatak.
- Prošetajte do posla ako možete ili bar dio puta pređite pješke
"Samo 30 minuta kretanja na dan donosi nam zadovoljstvo, oslobađaju se hemikalije koje donose radost, a stvari počinjemo da gledamo kroz ljepšu prizmu" - priča Kim Strobel, trener za sreću.
Kad god se krećemo ili vježbamo to je dobro za naše tijelo, ali posebne benefite imamo od jutarnjeg vježbanja. Zbog njega ćemo biti budniji, fokusiraniji i spremniji za novi radni dan.
- Ne otvarajte mejlove prvih sat vremena u ponedjeljak ujutru
Budući da je ponedjeljak zapravo kao hladan tuš, nakon vikenda u kom smo uživali u aktivnostima koje volimo, obaveze koje nas čekaju ujutru mogu nam stvoriti visoku dozu teskobe. Zato - ponedjeljkom ujutru, bar prvih sat vremena, pokušavajte da izbjegnete mejlove. Nemojte odmah da uzimate ni mobilni, da pozivate. Dopustite sebi da se priviknete na radnu nedjelju.
Izvor i foto:Kolektiv.me
Tekst objavila: Jasminka Mulić
