Košarkaši Jute pobijedili su noćas na gostovanju ekipu Denvera sa 115:109, a srpski košarkaš Nikola Jokić je za domaći tim ostvario tripl-dabl učinak.

Najefikasniji u ekipi Jute bio je hrvatski igrač Bojan Bogdanović sa 36 poena, 13 skokova i četiri asistencije, Rudi Gej je postigao 18 poena, uz sedam skokova, a poen manje je dodao Donovan Mičel.

Jokić je u porazu svog tima postigao 26 poena, uz 21 skok, 11 asistencija i dvije blokade, a ovo mu je ujedno 64. tripl-dabl u karijeri, dok su Vil Barton i Monte Moris upisali po 20 poena.

Ekipa Jute posljednji put je na gostovanju poražena 7. novembra, od Orlanda.

Juta je treća na tabeli Zapadne konferencije sa 28 pobjeda i 10 poraza, a Denver poslije 36 utakmica u NBA ligi ima polovičan učinak.

Dalas je na svom terenu bio bolji od Golden stejta sa 99:82.

Tim iz Teksasa je do četvrte uzastopne pobjede vodio Luka Dončić sa 26 poena, osam asistencija i sedam skokova, Dorijan Fini-Smit je dodao 17 poena, uz devet skokova, dok je Džejlen Branson upisao 15 poena.

izvor: rtcg