Započnite jutro uz ovaj zdravi slatkiš

Posne palačinke se jednostavno prave, a jako su ukusne. Uostalom ovaj posni doručak se pravi od prezrelih banana koje biste inače bacili, tako da su i praktične.

Biće vam potrebni sljedeći sastojci:

– 2 prezrele banane,

– 100 grama ovsenih pahuljica, ili ovsenog brašna

– 1 puna kašika ovsenih mekinja

– 220 mililitra biljnog mlijeka

– prstohvat soli

– prstohvat šećera

– 2 supene kašike soka od limuna ili limete

– malo ulja

Priprema: ovo je tip američkih palačinki, dakle tijesto je gušće i ispadaju malo deblje i sočnije. Najprije sameljite ovsene pahuljice. Pahuljice moraju obavezno biti suve da bi se ponašale kao brašno. U samljevene pahuljice dodajte i kašiku ovsenih mekinja.

Oljuštite banane i iznječite ih, napravite pire od banana, koji ćete zaliti sokom od limuna. Nakon toga pomiješajte sa biljnim mlijekom. Biljna mlijeka su skuplja od kravljeg. Možete ih cijediti sami ili kupiti mlijeko u prahu u prodavnici zdrave hrane – čime ćete znatno ušdedjeti. U smjesu od banana i mlijeka dodajte brašno iz blendera, dodajte prstohvat soli i prstohvat šećera.

Najbolje je koristiti teflonski tiganj kako se tijesto ne bi lijepilo za dno. Podmažite sa malo ulja i propržite palačinke. Ovaj posni doručak se brzo sprema, dovoljno je da palačinke budu u tiganju par minuta.

Izvor i foto: Kolektiv. Me

Tekst objavila: Ljilja Brajković